Akrylmaling på mellomtrinnet (28.03.12)
  Elevane i 5.-7. klasse fekk prøve seg som kunstnarar ein dag i februar. To profesjonelle kunstnarar frå Stavanger hadde kurset, først teori frå kunsthistoria og så praktisk maling. Her kan du sjå nokon av dei fine kunstverka! Om du vil sjå fleire, heng alle utstilt på skulen.  Sjå bilete i skulen sitt album.

9. klasse har meldt seg på filmkonkurranse! (07.03.12)
  Den siste tida har elevane arbeida med manus, filming og redigering for å sende inn eit bidrag til ”Fiskesprells filmkonkurranse”. Temaet for filmen skulle vere ”Matglede med sjømat”,  der elevane trakk fram dette med at ein kanskje synest fisken ser ekkel ut for somme.  Mr.Fisk, som meiner den nå veldig kjente Mr. Melk har fått for mykje tid i rampelyset, tak saka i eigne hender med hjelp av 9. klasse. Ein sporty 3.klasse stilte opp som testpersonell, og konklusjonen var klar – fisk er godt!

  Nå kryssar 9.klasse fingrane for å sjå om deira film nådde heilt opp – premien er nemleg 10 000 kr til klassekassa.

På skuleball i Etne (07.03.12)
  Torsdag før vinterferien var ungdomsskulen på ball i Etne.  Enge skule var vertskap for denne fine opplevinga.  Sjå bilete i skulen sitt album.

Ei stor oppleving for Skånevik skule (07.02.12)
  Med buss-sponsing frå det lokale næringslivet fekk me ta turen til Voss, der det var Noregsmeisterskap på ski. Me valde torsdag den 26. januar, sidan det var denne dagen me fekk høve til å heie på Chris Jespersen.  Heile 84 elevar og vaksne melde seg på, plakatar og heiarop vart laga, og humøret var på topp!                        Sjå fotoalbum frå turen til Voss

Me måtte opp litt tidlegare enn vanleg, då bussen hadde avreise klokka 0700. Rett før me køyrde kom Larsen Bakeri med bollar som me skulle få. Dette vart me sjølvsagt svært glade for –TUSEN TAKK!! 

Turen til Voss tok fire timar. Når me kom fram vart me tatt i mot av ein elev frå den vidaregåande skulen på Voss, som førte oss til basen vår. Basen var på eit aktivitetsområde der det var masse kjekt å finne på. Alt frå ansiktsmaling til villmarksleir, sceneunderhaldning, aking og miniski. Fleire av elevane var med på scena og framførte eit heiarop til Chris. Om han høyrte oss veit me ikkje, men det var i alle fall ein skiløpar verdig.

Høgdepunktet var nok utan tvil 15 km friteknikk. Me stilla oss opp forskjellige stader langs løypa for å sjå og heie på Chris. Han gjekk forbi oss tre gonger, og alle gongene heia me så godt me kunne. Fleire synest og det var stas å sjå Therese Johaug og Petter Northug jr, medan andre til og med fekk eit glimt av HKH Kong Harald.  Me var på Voss til alle var gått i mål, og Chris hamna til slutt på 19.plass. Han var ikkje heilt nøgd med det, men me frå Skånevik skule er i alle fall nøgde med å ha sett han i aksjon! Me vil tru at den store heiagjengen gav han litt ekstra energi til resten av NM, der han til og med fekk bronse i stafetten på søndagen!!

Sjå fotoalbum frå turen til Voss

Aktivitetar før jul  (12.12.11)
  Så er me inne i innspurten også for dette semesteret. Tentamen, juleverkstad, baking og andre juleaktivitetar er i gong. Litt om det som skjer framover:
Juleverkstad: Klassane har juleverkstad til ulike tider framover. 1.-4. kl tysdag 13. desember og 5.-7.kl. onsdag 14. Føresette er velkomen til å hjelpe til eller sjå. Meir informasjon om juleverkstad blir gitt på lekseplanane. Her vil det nok og stå ein del anna informasjon desse siste vekene, så det er bra om ein kikkar ekstra godt på lekseplanane framover. Les om alle aktivitetane

Indiamarknad (07.11.11)
  Fredag 29.oktober hadde me den årlege FORUT-marknaden på småtrinnet. Me hadde i forkant blitt kjende med 5 år gamle Indrani frå India via musikk, dans og forteljingar.  Ho kjem frå slumområda i Bangalore, der ho bur saman med besteforeldre og ein bror. Mor og far og eldstebroren, som har epilepsi, bur hjå farmor og farfar. Indrani går endå i barnehage, men me håpar at ho og venene hennar  med hjelp frå FORUT-midlar får ein heilt ny og fin skule.

Heile skulen på tur (07.10.11)
  Fredag 30. oktober var heile skulen på tur.  Alle var i godt humør, veret var strålande  og vi koste oss med grilla pølser.  Dei som gikk lengst var på Leknesnepa. 

Med penslar og stilas (10.06.11)
  Forrige skuleår laga 6. og  7. klasse fine skisser til korleis inngangspartiet på skulen kunne få ei ansiktsløftning. No er det endelege resultatet ferdig, utført av årets 7. klasse. Dei har finpussa idear, skissa, klatra i stilas og malt med flotte, friske fargar. ”Terrassen til Mary” er ny til sommaren!

Spar jentebølgen (10.06.11)
  Sjå bilete frå Spar Jentebølgen den 27. mai der Norsk Lærarindelaug deltok.

Thorbjørn Egner - kveld (10.05.11)
  Tysdag den 22. mars kl. 18.30 arrangerte 1. - 4. kl. Egner-kveld gymsalen på Skånevik skule.  Sjå mange fine bilete i vår album frå denne kvelden!

UKM -fylkesfinale i Bergen (12.04.11)
  2.-3. april deltok Gunvor og Alexander frå Skånevik skule, på fylkesfinalen i Ungdommens Kultur Mønstring. Dei to flotte portretta, inspirert av sjølvaste Picasso, vart stilte ut i Grieghallen saman med mange andre verk frå heile Hordaland. Sjå www.ukm.no for meir bilete og info om mønstringa.

Internasjonal kveld (29.03.11)
  Onsdag kveld den 16. mars inviterte mellomtrinnet familiane sine til internasjonal kveld på skulen. I eit tverrfagleg prosjekt mellom samfunnsfag, RLE, norsk, musikk og kunst& handverk, har elevane gruppevis fordjupa seg i ulike land og kulturar. Dette resulterte i afrikansk dans, norsk folkemusikk og trommeinnslag frå scena, samt ei fargesprakande reiselivsmesse. Her reklamerte elevane for sine land gjennom plakatar, illustrasjonar, souvenirar og innbydande smaksprøvar. Ein flott kveld!
På vegne av oss kontaktlærarar på mellomtrinnet: Stor takk til alle som kom, og for all hjelp elevane har fått med utstyr og smaksprøvar. Sjå bilete i album
 

Sjølvportrett inspirert av Picasso (18.02.11)
  7. klasse har i kunst og handverk jobba med kunstnaren Pablo Picasso. Ut frå hans teknikkar, form- og fargeval, har elevane latt seg inspirere, og kombinert med element som fortel noko om dei sjølve. Bileta som også har delteke på UKM i år, heng no til utstilling på skulen.

Pepperkakebygd (13.12.10)
  Med kvistar, karnappar, utbygg,  og både beine og skeivare vinklar, pyntar no ei flott samling pepperkakehus opp inngangspartiet på skulen.
5., 7. og 8. klasse har stått for uforming og bygging . Elevane har teikna perspektiv, laga mønster og modellar, baka, pynta og bygd. Ein omfattande prosess, med mykje læring både innan kunst og handverk, matematikk og kjøkken. Trolldeigfigurane har også klassane laga sjølve. Sjå bilete i album

Skulearket desember 2010 (13.12.10)
  Rektor:  Så er me inne i innspurten også for dette semesteret. Tentamen, juleverkstad, baking og andre juleaktivitetar er i gong.

Litt om det som skjer framover:
Juleverkstad:  Klassane har juleverkstad til ulike tider framover. Informasjon om dette blir gitt i lekseplanane. Her vil det nok stå ein del anna informasjon og desse siste vekene, så det er bra om ein kikkar ekstra godt på dei nå.

Søndag 12. Julekonsert i kyrkja:  Elevar i 1.–5. kl er spurd om å delta med eit par songar. Avheng av kor mange som kan møta.  Les heile skulearket

MOT til å glede dagen 23. november (30.11.10)
  Som ungdom over heile landet markerte også Skånevik ungdomsskule MOT til å glede dagen.  Ein dag som handlar om å bry seg litt ekstra, både ovanfor kjende og ukjende.

Ungdommane i Skånevik viste godt igjen i Skånevik sentrum nokre timar denne dagen. Det vart delt ut pepperkaker i ferjekøen, lykkeboller og lappar med hyggeleg bodskap til forbipasserande. På Spar vanka det både gratis pepperkaker og hjelp til å pakke i posane. Nokon gjekk på besøk nedover i klassane og arrangerte leikar, medan andre gjekk på besøk i barnehagen.

Vil du gjere noko ekstra kjekt?

- Ta ein telefon/send ein sms til nokon du ikkje har snakka med på lenge.

- Gjer ein teneste for nokon som treng det.

- Overrask heime med nybaka boller.

- Smil og sei hei til nokon du ikkje kjenner så godt!

Indiamarknad (03.11.10)
  Fredag 29.oktober hadde me den årlege FORUT-marknaden på småtrinnet. Me hadde i forkant blitt kjende med 5 år gamle Indrani frå India via musikk, dans og forteljingar.  Ho kjem frå slumområda i Bangalore, der ho bur saman med besteforeldre og ein bror. Mor og far og eldstebroren, som har epilepsi, bur hjå farmor og farfar. Indrani går endå i barnehage, men me håpar at ho og venene hennar  med hjelp frå FORUT-midlar får ein heilt ny og fin skule.

Elevane kunne ha med seg ”lopper” som dei ville selje til inntekt for FORUT. Foreldra stilte med kaffi og kaker,  som me selde på kafeen. Der kunne ein også kjøpe ”Rice and Curry” som er ein kjent indisk rett. Det var også lotteri, og underhaldning med song og dans.

Sjå album

UMM - Ungdom med MOT (19.10.10)
  4.-5. oktober vart 15 ungdommar frå Etne kommune, frå Enge- og Skånevik skule, skulerte til å vera ungdom med MOT. Denne positive gjengen ynskjer å vera gode førebilete og miljøskaparar på skulane sine. Kurset fann stad på Rullestad og vart leia av Therese Brekke Lundal, Hege Garvik og Siri Klokkerstuen.

MOT sin visjon er å gi ungdom eit varmare og tryggare oppvekstmiljø. Å rusta ungdom til å ta sjølvstendige, fornuftige  valg. Å ha MOT til å bry seg, MOT til seia nei om det trengst, og ha MOT til å leva og vera seg sjølve.

Gled dykk til MOT til glede dagen 23. november! Då får de sjå meir til desse 15 og alle dei andre kjekke ungdommane på skulane våre!

Vennskapslunsj (07.10.10)
  I veke 37 denne hausten har mellomtrinnet hatt vennskap på timeplanen. Klassane har sunge, dramatisert, teikna og snakka om temaet. Fredag 17. september arrangerte me felleslunsj for alle 5.-7. klasse.  6. klasse hadde baka deilige rundstykke og skulen kjøpte inn godt pålegg. God matlyst, god bordskikk og positiv stemning gjorde dette til ei kosleg avslutning på veka.

Ut på tur.  Aldri sur. (21.05.10)
  Tre onsdagar på rad har 8. klasse vore ute på tur:
05.05 var me saman med 8 . klasse på Enge skule på turistforeininga sitt landsomfattande opplegg OPPTUR. Det blei ein fin og kjekk dag. Me gjekk opp Ryggjalia til vatnet Tosko der me åt nista og kosa oss. På vegen opp hadde Etne turlag laga til postar med oppgåver. Fine premiar vart trekte ut, men dei gjekk til Enge. Alle fekk T-skjorter og frukt då me kom attende til start. Fint ver og kjekk tur.

12.05 var 8. og 9. klasse ved Skånevik skule til Stord og sprang TINE – stafett. Dette er også eit landsomfattande opplegg. Me enda på 4. plass, og det var me nøgde med sidan me er så få i klassen.  T-skjorter fekk me denne dagen også !  Det vart elles tid til litt shopping og kos på Leirvik før me tok båten heim igjen.

19.05 drog me på sykkeltur til Sandvik der me grilla og kosa oss. Nokre dreiv med avansert matlaging, dei tøffaste var uti og dukka. Soling og  ballspel vart det og.  Denne turen vart bestemt i klasseråd dagen før. Denne veka er det nemleg MOT si ”Begeistringsveke” på ungdomstrinnet. Me snakka om kva som gjer oss begeistra t.d. smil, ros, at nokon tar kontakt osb. Men alle var einige om at det å gjera noko kjekt i lag i klassen,  gjer oss glade og begeistra. Mange forslag vart drøfta, men vedtaket blei altså sykkeltur til Sandvik. Sol og fint ver fekk me denne dagen og. Sjå album

Engelskprosjekt 50-,60-,70-talet (20.05.10)
  8. klasse har hatt ei gruppe oppgåve i engelsk med å presentera kvar sitt tiår.  Gruppene valde sjølv stoff og presentasjonsmåte. Dei fleste valde å ta med litt klede. Her er nokre av antrekka. Sjå album

Med nebb og fjør (18.03.10)
  Fargerike fantasihøns er no å sjå i utstillingsmonteret på skulen.  6.- 7. klasse har forma og designa ved hjelp av avispapir, tape, gips og maling. God påske!

Ski og leik på Øspehaugflaten
  Tysdag 9. mars var 1.-7. klasse på felles skidag på Øspehaugflaten/ Tjellebakkane. Med fine løyper, hopp og leik i bakken, samt bålkos, vart dette ein fin dag for både små og store.  Lite bilete skuldar me på læraren, som ikkje lada kameraet før turen.

Teatersminke
  3. klasse utfoldar seg med teatersminke.  Det å verta sminka i heile ansiktet er ikkje berre berre. Nokon syntest det var deilig medan andre syntest det var ganske så ekkelt.  Dei jobba saman to og to, alle fekk prøve både å bli sminka og å sminke sjølv. Resultatet vart rett og slett skremmande...

Sjå album

Kolstift og kroki
  Med inspirasjon frå sjølvaste Leonardo da Vinci, har 6.- 7. klasse studert menneskekroppen ved å stå modellar for kvarandre. Me har studert kroppsstillingar, proporsjonar og ikkje minst korleis ein kan få dette ned på papiret. Krokiteikning tyder ”raske skisser”, og elevane har ikkje nytta mange minuttar på teikningane. Utstillinga er å sjå i glasmonteret på skulen.

Sjå album

Matematikkens dag
  På Skånevik skule har matematikkens dag blitt ein god tradisjon. Heilt sidan 2002 har me hatt ein heil dag med matematikk for alle elevane på skulen. Dagen blir delt i tre økter:  spel, problemløysing og geometri/forming. Elevane jobbar saman i grupper på tvers av klassane, på kvart av dei tre trinna. Det er kjekt å sjå store og små elevar samarbeida, og løysa oppgåver i lag. Det er mange elevar som oppdagar at matematikk er så mykje meir enn pluss og minusstykke i boka.

På mellomtrinnet og ungdomstrinnet er det og ein konkurranse om å bli den gruppa som samlar mest poeng. Her  tel  vinnarflaksen på speleøkta, evna til å finne kreative løysingar på problemløysingsoppgåvene og til å gjere eit nøyaktig og fint arbeid på formingsaktiviteten. Vinnargruppene får ein tur på Larsen for å kosa seg med mat og drikke.  Bilda vitnar om stor aktivitet og ein annleis dag! Sjå album

Snøaktivitetar i 1. og 2. klasse
  Her er den spreke gjengen i 1. og 2. klasse. Me hadde ein kjempefin dag på Ospehaugflata i skiløypene der ein torsdag i januar. Først bar me ski og sekkar opp til tanllegen sitt hus, før me tok på oss ski og gjekk opp til dei oppkøyrde løypene. Så gjekk og gjekk me, før me koste oss med mat og drikke. Men ikkje nok med det..., me bar ski og sekkar nedatt og! Me har og hatt mange fine turar i akebakken på skulen, laga isskulpturar, borger og mykje anna. Kjempekjekt med snø!  Sjå fleire bilete på klassen si side

Frukost på skulen
  I mange år har 1. og av og til 2. klasse ete frukost på skulen. Alle startar dagen gode og mette, og klar til innsats. Alle får og sagt det dei har på hjarta, og det er ikkje lite. Seinare på dagen blir det altfor lita tid til den gode praten. Håpar me kan halde fram med dette i åra framover og.

Vinteraktivitetar
  3. klasse hadde fin tur til Åsheim, tysdag 12.januar. Det var fleire bakkar me kunne renne i. Både ski og akebrett fekk me lov å bruke. Maten smakte godt rundt bålet, særlg dei varme pølsene. Det var -5 grader, men me fraus ikkje. 
  Tysdag 12. januar drog 8. klasse til Etne for å skeisa på Etne fjorden.  Det var ein fin tur. Kjekt å skeisa. Sola skein og vermde ganske godt, men det var også bra å drikka varm kakao frå termos .
  5. klasse hadde også ein fin skidag saman med lærarar og rektor.   Med sager, knivar og masse kreativitet har 4. klasse laga utstilling for forbipasserande ved Skånevik skule. Stopp opp og la deg inspirera neste gong du går forbi!  Sjå album

Å male på snøen! 
  Jentene har laga fruktfat. Først forma dei snøen ved hjelp av hender og sag, deretter har dei måla snøen i friske fargar.

Minikonsert
  Siste musikktimen før jul hadde U-trinnet mini-konsert for dei yngre elevane. "Imagine", "Mary's boychild" og "Happy X-mas" vart framført av tre ulike grupper med elevar. Sjå album

Juleverkstad s-trinn
  I år prøvde me ein ny vri på juleverkstaden for småskulen. Me inviterte elevane med foreldre til å koma på kveldstid onsdag 9. desember. Mange stilte opp, og det vart ein koseleg førjulsaktivitet. Programmet var delt i tre økter: lage "julemus", lage julenisse og grille pølser ute på bål. Hektisk aktivitet og mange blide fjes var å sjå! Sjå album

Grautfest
  Fredag kom foreldre frå FAU og laga graut til alle elevar og vaksne på skulen. Elevane samla seg rundt langbord, og kosa seg med måltidet. Det var og mandler i grauten, så nokon var heldige og fekk med seg ein premie heim. Takk til FAU som ordnar dette i stand for oss! Sjå album

Juletrefest
  Torsdag kveld var det fullsett gymsal. 1.-7. klasse hadde juletrefest, og folk møtte mannsterke opp. På scenen var det mange utradisjonelle innslag dette året. 1.-2. klasse starta det heile med eit skodespel der me på grunn av det spesielle lyset berre såg kvite gjenstandar. Dette utnytta dei til fulle, og stjerner og englar dansa over scenen. 3. klasse hadde tatt utgangspunkt i serien Blåfjell og framførte songar med dans og rørsle til. 4. klasse starta friskt med "Hjalmar", og dei 3 tøffe gutane gjorde ein spesielt god innsats. Etterpå følgte dei opp med "Julekveldsvise", der dei ulike juleførebuingane blei demonstrert. 5.-7. klasse hadde felles innslag med sirkusførestelling. Elevar triksa, hoppa tau, turna, slo hjul, var klovn, steila på sykkel, triksa med diablo og mykje andre triks samtidig som dei framførte songen "Det er stilig". Også dei avslutta sitt innslag med ein julesong: "I en natt". Etterpå vart det gong rundt juletre og sjølvsagt mandariner frå nissar i 7. klasse. Flott gjennomført program! Sjå album

Juleverkstad for mellomtrinnet
  Onsdag 16.12. hadde mellomtrinnet juleverkstad heile dagen. Elevane var delt i tre aldersblanda grupper og var innom 3 ulike stasjonar: baking av julemenn, støyping av lys og filting av julepynt. Det såg ut som elevane kosa seg og med litt julemusikk i bakgrunnen var stemninga god. Kanskje det blir sjølvlaga julepresangar til familien?  Sjå album

Juletrepynting 8. klasse
  Det er tradisjon at 8. klasse pyntar det store juletreet i gymsalen kvart år. Det er ein stor jobb, og ein må ta i bruk både galleriet og stige for å nå opp i toppen. Men når arbeidet er gjort blir resultatet flott!

Lucia
  Mandag 14. des gjekk 3. klasse Lucia på heile skulen. I veka før hadde dei bakt Lucekattar som dei delte ut til både born og vaksne. Eit hyggeleg innslag i adventstida.

Ein støvel til å bli glad av(08.12.09)
  I løpet av hausten har 4. klasse jobba med å designe ny dekor til ein gamal støvel. Kva blir du glad av? Dersom hausten og vinteren kjennest mørk og trist, kan det kanskje hjelpa med ein trivelig støvel? Elevane har idèmyldra, skissa, vaska, grunna, malt, dekorert og lakka- og resultata er no å sjå i utstillingsmonteret til Skånevik skule. Velkommen på utstilling.

Konsert for u-skulen  (25.11.09)
  Rafi ki – min venn av Hussein Masimbi og Trym Bjønnes «Ein venn er noko som hjartet treng heile tida»  Publikum frå U-skulen fikk høyre ein flott konsert med blanding av tradisjonell musikk frå Noreg og Tanzania, med element frå blues, populærmusikk og world. Nytt og gammalt blei blanda i eit vokalt og rytmisk uttrykk. Les meir

MOT til å glede 2009 (24.11.09)
  Måndag 23. november markerte ungdommar over heile landet MOT til å glede dagen.  På Skånevik skule hadde elevar frå ungdomsskulen meldt seg på ulike komitear, for å spre glede i lokalsamfunnet. Og kreativitet og entusiasme var det rikeleg av! Ungdommane delte ut smil og pepperkaker i ferjekøen, pakka varer på Spar, delte ut hyggelege kort til forbipasserande, gjekk på barnehagebesøk og klassebesøk på småtrinnet.  ”Den største gleda ein kan ha, det er å gjera andre glad”.

Skulejoggen 2009 (20.11.09)

Kvitebjørn (28.10.09)
  6. og 7. klasse er i gong med kvitebjørnprosjekt, i år som i fjor. Tema for i år er "fantasi og skaparkraft" og litt av målet er at elevane skal bli betre kjend med heimbygda si.  Følg med på bloggen vår i veke 44 og 45. Her kan du også få vite meir om sjølve prosjektet.

Fjelltur til Lyngtun (25.09.09)
  Tysdag 15. september var heile skulen på fjelltur. 1.-4. klasse gjekk då til Lyngtun, fam. Bøthun si hytte. Det var litt tungt, men alle kom opp og kosa seg med leik og mat.

Fjelltur til Ulvanåsi (25.09.09)
  Tysdag 15. september var heile skulen på fjelltur. Dei hadde lova oss fint ver, men det vart overskya, tåka og litt regn. Likevel gjekk 50 blide elevar  oppover mot Ulvanåsi. Halvparten valde å stoppa på Dyrrind, medan halvparten kom heilt til topps! Dessverre fekk dei ikkje nyte den flotte utsikten på grunn av veret!  Sjå album

Felles lunsj for ungdomstrinnet (23.09.09)
  Klassane har snakka litt om vennskap,  om samvær og om å vera høflege og greie. I samband med dette hadde me ein lunsj  der alle bidrog. 10. klasse stod for borddekking og bordkort, 8. klasse baka og smurde lefser, og 9. klasse hadde hovudansvaret og laga fint koldtbord.

Fotoalbum for Skånevik skule

Trykk på Vis alle album for å få ein oversikt!